നിയമങ്ങൾ പാലിച്ചില്ല: കുവൈറ്റിൽ 20 ഫാർമസികൾ അടച്ചുപൂട്ടി
കുവൈത്ത് സിറ്റി: ഗുരുതരമായ നിയന്ത്രണ ലംഘനങ്ങൾ നടത്തിയതിന് ഒന്നിലധികം ഗവർണറേറ്റുകളിലായി 20 ഫാർമസികൾ അടച്ചുപൂട്ടി. നിയമവിരുദ്ധമായ ഫാർമസ്യൂട്ടിക്കൽ സമ്പ്രദായങ്ങൾക്കെതിരെ വ്യാപകമായ നടപടി സ്വീകരിക്കുന്നതിന്റെ ഭാഗമായി, കുവൈത്തിലെ വാണിജ്യ വ്യവസായ മന്ത്രാലയം, ആരോഗ്യ മന്ത്രാലയവുമായി ഏകോപിപ്പിച്ചാണ് നടപടി. ഫാർമസ്യൂട്ടിക്കൽ മേഖലയെ ശുദ്ധീകരിക്കാനുള്ള തുടർച്ചയായ ശ്രമത്തിന്റെ ഭാഗമായാണ് ഈ നീക്കം, 2023-ൽ സമാനമായ ഒരു കാംപെയ്‌നിനെ തുടർന്ന് 60 ഫാർമസികൾ അടച്ചുപൂട്ടിയിരുന്നു. ആ സ്ഥാപനങ്ങൾ അനധികൃത മൂന്നാം കക്ഷികളാണ് നടത്തുന്നതോ കൈകാര്യം ചെയ്യുന്നതോ ആണെന്ന് കണ്ടെത്തിയിരുന്നു. ഇത് ദേശീയ ആരോഗ്യ സംരക്ഷണ ചട്ടങ്ങളുടെ നേരിട്ടുള്ള ലംഘനമാണ്.
മന്ത്രാലയത്തിന്റെ നടപടികൾ പിന്നീട് കാസേഷൻ കോടതി ശരിവച്ചു. അവരുടെ ലൈസൻസുകൾ റദ്ദാക്കുന്നതിന്റെ നിയമസാധുത സ്ഥിരീകരിച്ചു. ഏറ്റവും പുതിയ പരിശോധനകൾക്ക് വാണിജ്യ വ്യവസായ മന്ത്രി ഖലീഫ അൽ-അജീലും ആരോഗ്യ മന്ത്രി ഡോ. അഹമ്മദ് അൽ-അവാദിയുമാണ് മേൽനോട്ടം വഹിച്ചത്. മേൽനോട്ടം കർശനമാക്കുക, ദുരുപയോഗം ഇല്ലാതാക്കുക, പൊതുജനാരോഗ്യം സംരക്ഷിക്കുക എന്നിവ ലക്ഷ്യമിട്ടുള്ള ഉന്നതതല മന്ത്രിതല നിർദേശങ്ങൾ കാംപെയ്‌ൻ പ്രതിഫലിപ്പിക്കുന്നുവെന്ന് ഉദ്യോഗസ്ഥർ പറഞ്ഞു
Comments (0)